Huza Club : umugwi wihaye umugambi wo guhuza no guteza imbere urwaruka biciye mu nkino no gusangira ubumenyi

Vyanditswe itariki 23.01.2017

 

Nk’uko abantu benshi bamaze kubibona, haba mu gisagara ca Bujumbura canke hagati mu gihugu, haramaze kuvuka amashirahamwe menshi yo kwinonora imitsi yaba ay’abakozi ba Leta, ay’abikorera utwabo canke ay’abanyeshure, aho usanga abanywanyi bahura mu mpera z’indwi bakinorora imitsi mu nkino n’ibikorwa bitandukanye maze bagakomeza ubucuti. Kur’uyu w’Imana 22 nzero twaritavye ubutumire bw’umugwi Huza Club ufise icicaro muri Komine Ntahangwa tukaba tubiganirira ibikorwa umaze gushikako n’imigambi ufise.


Bamwe mu banywayi ba Huza Club bari bitavye imyimenyerezo yo kur'uyu w'Imana

 

Huza : izina ryatowe mu kwerekana ko inkingi nyamukuru y’umugwi ar’uguhuza urwaruka



Nk’uko twavyiganiriwe na Jean Didier Ntungwanayo, umuyobozi w’uwo mugwi, iciyumviro co kuwushinga cavuye ahanini ku mwitwarariko wo kugira ihuriro ryo guhanahana ivyiyumviro ku migambi yo kwiteza imbere bikajana no gukomeza ubucuti mu kwinonora imitsi bari hamwe. Niho rero baca batora izina « Huza » nk’ikimenyetso c’uko ingendo nyamukuru ar’iyo guhuza urwaruka, bagashira hamwe ivyiyumviro bitandukanye maze bagashobora kwiteza imbere bakanabera akarorero urundi rwaruka.

Yarongeye aratumenyesha uko uwo mugwi utunganijwe: ufise urwego nyobozi rugizwe n’umukuru w’umugwi n’icegera ciwe, bagaca bafashwa n’umunyamabanga nshingwabikorwa, uwujejwe gutunganya imigambi hamwe n’umunyabigega n’icegera ciwe. Nk’uko uwo mugwi ushingiye ku bikorwa vyo kwinonora imitsi, ufise kandi n’umugwi w’ubuhinga ujejwe gutunganya ivy’inkino harimwo n’umumenyereza w’umupira w’amaguru Eric Sinzobahwanya yabinonosoye mu gihugu ca Cameroun, akaba yarashimye ivyiyumviro vy’urwo rwaruka aca aritanga kuza ararufasha mu myimenyerezo.

Abandi banywanyi bahurikiye muri Huza Club bagizwe n’urwaruka rukuze n’urukiri ruto, hakaba harimwo abaganga, abashingwamanza, abasirikare, inyamiramabi, abahinga batandukanye mu burimyi, mu gutumatumanako amakuru, mu vy’ubutunzi n’ibindi vyinshi. Harimwo kandi n’urwaruka rukiri mu mashure n’urundi rukora imyuga itandukanye hakaba harimwo n’abakinyi basanzwe bakina mu migwi y’umupira w’amaguru y’icicaro ca mbere n’ica kabiri bashimye kuza baraza kwifatanya na Huza Club mu myimenyerezo yabo bagirira kw’ishure Lycée du Saint Esprit isaha zitandatu ku musi w’Imana.

Ibikorwa Huza Club imaze kurangura n’imigambi bafise



Justin Nibatunge ajejwe gutunganya imigambi mur’uwo mugwi yaraduciriye ku mayange ibikorwa nyamukuru bimaze kurangurwa n’imigambi ya vuba na kazoza. Yatumenyesheje ko kuva umugwi utanguye gukora muri Ntwarante 2016, hamaze kurangurwa ibikorwa bitari bike n’ibidi bikaba biri mu nteguro, bikuru bikuru akaba ar’ibi:

- Mu ntumbero yo kwunga ubucuti n’urwaruka rwo mu zindi ntara, Huza Club yaragendeye umugwi Maendeleo FC w’i Kayero mu ntara ya Rutana. Mur’urwo rugendo urwaruka rwa Huza Club rwahungukiye vyinshi cane kuko harimwo bamwe bamwe batari bwigere bahonyoza ikirenge kure y’i Bujumbura bakaba baboneyeho akaryo ku kubona ubwiza bw’igihugu nk’imanga ya Nyakazu n’isumo ryo mw’Ishanga.

- Huza Club yarongeye irakina n’imigwi y’imikino ya kivandimwe itandukanye i Bujumbura na cane cane iyo muri komine Ntahangwa, ikaba itegekanya kubandanya ico gikorwa no kungedera iyindi imigwi yo mu gihugu hagati mu ntumbero yo gufasha abanywayi bayo kumenya igihugu no kwonga ubucuti n’urwaruka rwo mu zindi ntara.

- Bivanye n’uko Huza Club ihurikiyemwo urwaruka rufise ubumenyi butandukanye, hariko hatunganywa umugambi munini wo gusangira ubumenyi n’urundi rwaruka na cane urwo mu ntara zo hagati mu gihugu, bikazoza birakorwa i ruhande yo gukina n’imigwi y’inkino za kivandimwe yo mur’utwo turere.

- Huza Club imaze igihe itororokanya impuzu z’abana bakiri bato, ikaba ifise umugambi wo kuzogendera amarerero y’impfuvyi yitwaje agakemanyi kagizwe n’impuzu, n’utundi tuntu nkenerwa tuzoba twabonetse, ko gutanga hahajeje kuba inkino.

- Huza Club ifise kandi umugambi wo gutunganya ibikorwa vyo kwigisha umupira w’amaguru abana bakiri bato no kwiyagura mu gutunganya no gukomeza izindi nkino mu ntumbero yo kwinonora imitsi mu buryo butandukanye.

Jutin Nibatunge yatubwiye ko hari n’iyindi migambi myinshi iriko irategurwa akaba yaciye aboneraho n’akaryo ko guhamagira uwo wese yoba afise ikigumbagumba co gufasha mur’iyo migambi kubashigikira uko ashoboye kwose kuko gushika kur’ino saha, Huza Club yikora ku ntererano z’abanywanyi mu kugura ibikoresho no gutunganya ibikorwa, akaba ar’intambamyi nini kuko usanga ibikenewe ari vyinshi kurusha ivyo abanywanyi bashobora kuronka. Uwo wese yokwipfuza kubashigikira ashobora kubibamenyesha mu kwakura kuri 71 74 16 04

Mu myimenyerezo bakoze kur’uyu w’Imana, bari bigabuye bakina hagati y’abamaze kwubaka izabo n’abakiri abasore, abasore barirahiye abubatse izabo ibitsindo bitanu kuri bibiri.

 

Jason Neretse

 

 

Ico mwiyumvira kur'iyi nkuru :

 

 

 

Primus Ligue, umusi wa 1

Flamb. Centre 0-1 Messager Bja

 

Primus Ligue, umusi wa 1

Kuwa 18/08
Bumamuru 13:00 (Buganda) Rukinzo
Athletico Ol. 15:00 (Buganda) Ngozi City
Aigle Noir 15:00 (Gitega) Vital'O FC
Kayanza Utd 15:00 (Urukundo) Les Lierres
Kuwa 19/08
Musongati 15:00 (Gitega) Olympic S.
Buja City 15:00 (Buganda) LLBS4A
Messager N. 15:00 (Urukundo) Flamb. Est