Mondial 2018: Lionel Messi yaraye afashije igihugu ciwe kuja mu bihugu 23 bimaze kuronka amatike y’igikombe c’isi

Vyanditswe itariki 11.10.2017

 

Umugwi nserukiragihugu wa Argentine waraye uvuye mu menyo y’ingwe kuko imbere y’urukino rwanyuma rwo kurondera itike ruwuhuza n’uw’igihugu ca Equateur, war’ufise amanota 25 ukaba mu kibanza ca gatandatu kidatanga uburenganzira bwo kwitaba igikombe. Kugira umugwi wa Argentine uronke itike canke ikibanza ca gatanu gitanga uburenganzira bwo gukina urukino rwo kudadanura (barrage) n’umugwi wo muri Océanie, wategerezwa kwigenza neza I Quito muri Equateur bigaca bihurirana n’uko imigwi ya Pérou (25) na Colombie (26) yatana mu mitwe irusha ikibanza Argentine itawugiye imbere uko ar’ibiri, na Chili (26) nawo nyene wari imbere yawo ukaba utaronse amahirwe imbere ya Bresil mu rukino rwabahuza. Tugaruke ku kuntu Argentine waronse itike tubabwire n’ibindi bihugu 22 bimaze kurironka.

 

Lionnel Messi yaraye arungitse Argentine mu gikombe c'isi ku ncuro ya 12 bikurikiranya (isanamu ya Juan Ruiz/AFP)

 

Lionnel Messi yarafashe ibintu mu « minwe »

 

Urukino rwatanguye nabi cane ku mugwi wa Argentine kuko mu masegonda 38 gusa bari bijijwe igitsindo cambere. Ivyakurikiye vyabaye ibitangaza vyakozwe na Lionnel Messi kuko ha kudebukirwa n’ico gitsindo, yaciye afata urukino mu “minwe” azana urugero rwo hejuru cane hamwe biboneka neza ko yafashe ingingo yo kuronderera itsinzi umugwi wiwe hasi hejuru. Ntivyatevye, ku munota wa 12 yaciye aronka igitsindo ca mbere ku mupira yahanahanye neza na Angel Di Maria. Ntiyagarukirije aho, yabandanije arongoye umugwi wiwe mu gusatira gushika naho yinjiza ica kabiri ku munota wa 20. Urukino rwabandanije umugwi wa Argentine usatira cane ariko ntihaboneka ikindi gitsindo gushika baje kuruhuka. Mu gice ca kabiri, Lionnel Messi yagarukanye bwa bwira nyene, aca aronka igitsindo ca gatatu ku munota wa 62 kiza gitsindagira intsinzi yariko iraboneka ko itahukana Argentine. Urukino rwarangiye ata gihindutse Argentine utsinze 1-3, uca wironkera n’ikibanza ca gatatu kuko Bresil watsinze Chili, Colombie nawo unganya na Pérou waciye ufata ikibanza ca gatanu gituma uzobanza kunyinyurana na Nouvelle Zélande mu kurondera itike.

Uko inkino zose zagenze mu karere ka Amerika y’Ubumanuko (AmSud):

Equateur 1-3 Argentine
Brésil 3-0 Chili
Uruguay 4-2 Bolivie
Paraguay 0-1 Venezuela
Pérou 1-1 Colombie.


Umugwi wa Chili waciye ufata ikibanza ca 6 gituma abakinyi b’ibihangange nka Alexis Sanchez batazokina igikombe c’isi co mu Burusia mu mwaka uza. Mur’ako karere ka AmSud, imigwi yarushanije amanota uku gukurikira:

1. Brésil (amanota 41)
2. Uruguay 31
3. Argentine 28
4. Colombie 27
5. Pérou 26
6. Chili 26
7. Paraguay 24
8. Equateur 20
9. Bolivie 14
10. Venezuela 12.

Edison Cavani, umusatirizi wa PSG na Urugway niwe yinjije ibitsindo vyinshi (10) mur’izo nkino zo gukuranamwo.

 

Urutonde rw’imigwi imaze kuronka amatike y’igikombe c’isi Russia 2018

 

Ibihugu 23 nivyo bimaze kuronka amatike arivyo :

1. Uburusia buzokwakira ihiganwa
2. Allemagne
3. Angleterre
4. Arabie Saoudite
5. Argentine
6. Belgique
7. Bresil
8. Colombie
9. Costa Rica
10. Egypte
11. Espagne
12. France
13. Iceland
14. Iran
15. Japon
16. Korea y’Epfo
17. Mexique
18. Nigeria
19. Panama
20. Pologne
21. Portugal
22. Serbie
23. Uruguay

Mu bihugu 9 bisigaye harimwo 3 bizova mu matsinda yo gukuranamwo muri Afrika,4 bizova mu nkino zihuza imigwi 8 yabaye iya kabiri mu matsinda y’i Buraya ( Suède, Suisse, Danemark, Italie, Croatie, Grèce, République d’Irlande, Irlande du Nord) na bibiri bizova mu nkino zo kudadanura hagati ya Australie – Honduras na Nouvelle Zélande – Pérou.

Amidou Hassan

 

 

Ico mwiyumvira kur'iyi nkuru :

 

 

 

Primus Ligue, umusi wa 1

Flamb. Centre 0-1 Messager Bja

 

Primus Ligue, umusi wa 1

Kuwa 18/08
Bumamuru 13:00 (Buganda) Rukinzo
Athletico Ol. 15:00 (Buganda) Ngozi City
Aigle Noir 15:00 (Gitega) Vital'O FC
Kayanza Utd 15:00 (Urukundo) Les Lierres
Kuwa 19/08
Musongati 15:00 (Gitega) Olympic S.
Buja City 15:00 (Buganda) LLBS4A
Messager N. 15:00 (Urukundo) Flamb. Est