Primus League: LLBS4A wasubiye mu kibanza cambere, Messager Buja nawo wavuye mu mazi ashushe

Vyanditswe itariki 28.01.2018

 

Ihiganwa rya Primus League ryarabandanije mur’iyi ndwi rikaba ryari rigeze ku musi waryo wa 17. Umugwi wa Flambeau de l’Est wari wakinye inkino 2 mu musi wa 16 w’ihiganwa nta rukino war’ufise, ku rundi ruhande, umugwi wa Bujumbura City utari wakinye mu musi wa 16 wakinye inkino 2. Inyuma y’imisi 17 y’ihiganwa rero, imigwi yose uko ari 16 ifise inkino 17, umugwi wa LLBS4A ukaba waraye usubiye kw’isonga ry’ihiganwa (wari watakaje inyuma y’umusi wa 14) bivanye n’itsinzi yawo 4-1 ca Flambeau du Centre yaje ikurikira itsindwa rya Messager Ngozi na Les Lierres 2-0. Tugaruke ku vyaranze umusi wa 17 w’ihiganwa.

 

Umugwi wa Flambeau du Centre wabanje gutangaza LLB mu kwuwinjiza 1-0 inyuma y'iminota 3 imbere y'uko LLB bivyukiranya

 

Les Lierres batangaje Messager Ngozi bategurira LLBS4A inzira y’ikibanza cambere

 

Imigwi ya Bujumbura City na Inter Star niyo yuguruye umusi wa 17, aho hari kuwa gatatu 24 Nzero aho Buja City wirahira Inter Star 1-0.

Kur’uyu wa gatandatu 27 Nzero niho hakinwa inkino zibiri zari zitezwe cane kuri Stade Prince Louis Rwagasore, umugwi wa Messager Ngozi wari kw’isonga ry’ihiganwa war’uramutse ugendera Les Lierres w’7, LLBS4A wa kabiri nawo ukaba war’uramutse wakira Flambeau du Centre wa 11. Abakinyi ba Les Lierres baje bazikenyeye, badugira hamwe bongera bamanukira hamwe, barabuza abakinyi b’imbere ba Messager kuronka imipira bongera basatira banyaruka ku ma « contre-attaques ». Igice cambere cagiye kurangira bamaze kwironkera 2-0 (Junior 7’, Salum 29’)mu buryo butatangaje na gato abarorerezi bari bahishikiye kuko berekanye umupira w’urugero runini kurusha abashitsi babo, bica bituma mbere urukino rurangira Messager Ngozi utabeze mbere Les Lierres banahushije ayandi mahirwe menshi naho ata kindi bashoboye kwongeramwo.

Inyuma y’itsinzi ya Les Lierres, intumbero yar’imwe gusa ku bakinyi ba LLBS4A : kuronka amanota 3 aca atuma baca kuri Messager Ngozi bagafata ikibanza cambere. Intango y’urukino ntiyagenze nk’uko bari bavyiteze na gato kuko inyuma y’iminota 3 gusa y’urukino Flambeau du Centre war’ubinjije 1-0. ABakinyi ba LLB baciye bivyukiranya barasatira bikomeye, mbere ntibateba kugikurayo kuko Jules Ulimwengu yaciye yandikisha 1-1 ku munota w’7. Urukino rwabandanije ruhengamiye ku ruhande rwa LLB biboneka neza ko bafise ibintu mu « minwe », eka mbere ntibatevye gushiramwo ica kabiri (Céléstin Habonimana) baca baja kuruhuka bafise 2-1. Igice ca kabiri cagize isura nk’iy’icambere kuko LLBS4A wafashe Flambeau de l’Est ku mababa no ku mahembe ubongera ibindi 2 (Iddy Saidi « Ballack », Jamal) urukino ruca rurangira bafise 4-1, n’amanota 41 abashira mu kibanza cambere basumvya rimwe Messager Ngozi.

 

Messager Bujumbura wavuye mu kibanza c’imigwi ikoroka icicaro usubirirwa na Ngozi City

 

Mu zindi nkino zibiri zabaye kuwa gatandatu, Aigle Noir wanganije na Olympic Star 1-1, Ngozi City nawo unganya na Les Jeunes Athlétiques 0-0

Kur’uyu w’Imana 28 Nzero, hari hategekanijwe inkino 3 zari zisigaye mu mus iwa 17. Musongati wanganije na Vital’O FC 0-0, Bujumbura City utsinda Athletico Olympic 2-0, maze Messager Bujumbura wirahira Delta Star 5-2. Iyo ntsinzi ya Messager Bujumbura yaciye ituma uva mu kibanza ca 14 wahoramwo usimbira muca 12. Umugwi wa Ngozi City utari bwigere uja mu bibanza bitatu vyanyuma vy’imigwi ikoroka icicaro waciye ufata ikibanza ca 15 inyuma y’inkino 7 zose wikurikiranya udatsinda.

Ihiganwa rya Primus League rizobandanya kuwa 11, 12 na 13 Ruhuhuma, impera y’indwi iza (02-05 Ruhuhuma) ikaba izokinwamwo inkino zambere z’igikombe c’Umukuru w’Igihugu.
Uko inkino zose zagenze mu mus iwa 16 na 17 n’uko imigwi isumbana mu manota :






Diègue Nifasha

 

 

Ico mwiyumvira kur'iyi nkuru :

 

 

 

Mondial 2018, 1/2 finale

France 1-0 Belgique
Croatie 2-1 Angleterre

Mondial 2018, ikibanza ca 3

Belgique 2-0 Angleterre

Mondial 2018, Finale

France 4-2 Croatie